O 5 de outubro de 2008 celebraremos a V Ruta a Lalín en BTT, unha nova edición con trazado inédito. Como xa sabedes os asiduos a esta marcha, todos os anos buscamos novos camiños e pistas, tratando de descubrir esquecidas e xenuínas paisaxes e recunchos case ignotos da comarca.

Neste ano a ruta iníciase en dirección este, buscando as terras de Camba, do veciño concello de Rodeiro. Tras uns primeiros quilómetros por terras lalinenses, rodamos polo dominios do concello de Dozón, paisaxes antigas e elevadas que serven de contraforte á serra do Faro. Pronto viramos para dirixirnos a Rodeiro e recargar enerxías. Logo encamiñámonos novamente cara os eidos de Lalín para movernos polos arredores do centro xeográfico de Galicia.

Boa parte desta segunda parte da ruta transcorre por unha das varias rutas xacobeas que cruzan o noso país; trátase do Camiño de Inverno ou Camiño Sur , unha ruta que nace no Bierzo, percorrida tamén polos peregrinos xacobeos que enlazan en Lalín coa Vía da Prata.

Paisaxe, camiños, carballos, carreiros, granito, auga, pontes ... unha morea de elementos acudirannos ao camiño para que insuperables sensacións se acheguen a nós o día da ruta. E que farán que a dificultade física e técnica (media) da marcha se torne máis levadeira.

Agradecervos de antemán a vosa participación, desexarvos que gocedes do percorrido e da amabilidade destas terras . Estamos a traballar para ofrecer os servizos habituais (avituallamentos, asistencia mecánica, ambulancia, duchas, lavado de bicis...) así como os merecidos agasallos e xantar.

Lembrade que saímos e chegamos desde o estadio M. Anxo Cortizo (o campo de fútbol) e que esta marcha puntúa para a COPA GALEGA DE CICLOTURISMO BTT.

Enlace fotos IV Ruta a Lalín BTT: http://picasaweb.google.es/IVRutalalinbtt/IVRUTALALINBTT

Fotos previas V Ruta a Lalín BTT: http://picasaweb.google.es/Alambikelalin