Amigas e amigos:

        Lalín converterase o 27 de xaneiro no epicentro do turismo culinario e cultural coa celebración da XL Edición da Feira do Cocido, unha das principais festas gastronómicas de Galicia, coñecida e valorada non só na nosa comunidade, senón en España e incluso no estranxeiro, que fai que cada ano nos visiten milleiros de persoas para degustar o prato máis recoñecido na nosa cociña.

         Nesta XL Edición queremos imprimirlle un valor implícito engadido e marcámonos como reto dar un paso adiante, co que editamos un libro no que se recolle todo o relacionado coa historia desta celebración, desde os seus comezos no ano 1968 ata a actualidade, con colaboracións dos pregoeiros e cartelistas, con fotografías representativas e cunha análise detallada de toda a súa evolución.

         Por suposto manteremos o amplo abano de actividades que vimos desenvolvendo en cada cita anual organizadas ao redor deste prato tradicional e que fan de Lalín unha referencia de interese inescusable nos albores de cada ano. Darán comezo co X Mes do Cocido (do 15 de xaneiro ao 14 de febreiro), e continuarán coa tradicional matanza, cos Básicos LKM0, coa Encomenda do Cocido ou co Divercocido para os máis pequenos.

         Debo agradecer tamén a colaboración prestada polo artista Antón Lamazares, que este ano elaborou ex profeso unha das súas obras para que servise de cartel promocional da Feira do Cocido, que a bo seguro servirá para amedrentar aínda máis o seu recoñecemento.

         Agardo que o bo saber e o cariño con que os nosos cociñeiros elaboran a receita sexan a base para unha exquisita preparación de pratos de cocido. Se a todo isto lle engadimos a habitual receptividade e hospitalidade que os lalinenses dispensamos, estou seguro que todos os que pasen pola nosa terra marcharán cunha lembranza inesquecible, ademais de cun bo sabor de boca.

         Deséxovos a todos un bo proveito e que gocedes de todo o que supón a Feira do Cocido.

Xosé Crespo Iglesias
Alcalde de Lalín