Amigos e amigas:

O próximo 15 de febreiro as rúas de Lalín encheranse de vida e dunha maxia especial para acoller a XLI Feira do Cocido, que converte ao noso Concello en capital do turismo gastronómico e cultural de Galicia ao longo do Mes do Cocido. A nosa Feira foise consolidando desde os seus alicerces e co paso do tempo como unha das principais citas culinarias de Galicia, de España e mesmo do estranxeiro. Cada ano son máis as persoas que nos visitan para degustar en compañía da familia ou dos amigos o noso prato emblema. O ano pasado logramos o récord con 60.000 visitantes e esperamos que na cuadraxésimo primeira edición recibamos similar ou  incluso superior número de visitantes.

A Lalín Pork Art, exposición itinerante de porquiños decorados por artistas plásticos, así como a Semana Gastronómica do Cocido de Lalín en Madrid, serán as principais novidades desta edición, que conta, ademais, cun cartelista de excepción, o internacional artista pontevedrés Jorge Castillo, un dos máis prestixiosos e cotizados pintores no ámbito internacional, a quen lle quero agradecer a súa colaboración desinteresada co Concello de Lalín. Así mesmo este ano teremos de novo un pregoeiro de altura, o xornalista Carlos Alsina, que ademais fará en directo o programa “La Brújula” desde Lalín.

Por suposto, manteremos o espírito da Feira aderezándoa co abano de actividades que cada ano vimos desenvolvendo ao redor do prato máis recoñecido da nosa cociña, que fan de Lalín unha referencia de interese indubidable nos primeiros meses de cada ano. Estoume a referir á tradicional matanza do porco, ao nomeamento de novos Comendadores do Cocido, aos premios de Gastronomía ou ao Premio Nacional de Xornalismo Gastronómico “Álvaro Cunqueiro”, entre outras, dunha longa ristra de “condimentos” en torno ao prato rei.

Agardo que o bo facer dos nosos cociñeiros na elaboración da receita do Cocido a base dunha exquisita preparación sexa do voso agrado. Só tedes que achegarvos nesas datas a Lalín, Quilómetro Cero de Galicia e próximo destino turístico de interior, onde sentiredes a hospitalidade da súa xente e onde poderedes degustar o mellor cocido do mundo.

Bo proveito a todos e que fagades de Lalín un punto de referencia inesquecible das vosas vidasa.

Xosé Crespo Iglesias
Alcalde de Lalín