O Mes do Cocido de Lalín é unha iniciativa municipal que ten como principal finalidade potenciar o sector da hostalería local mediante unha campaña de márketing específica, que se desenvolve dende hai anos entre o 15 de xaneiro e o 14 de febreiro, facendo bo o lema “De San Amaro a San Valentín, Mes do Cocido en Lalín”.

A Concellería de Comercio difunde o nome, a dirección e o teléfono dos 29 restaurantes lalinenses que colaboran neste XII Mes do Cocido para que calquera persoa ou colectivo que desexe acudir a Lalín a comer cocido entre o 15 de xaneiro e o 14 de febreiro teña cumprida información sobre a totalidade dos establecementos nos que pode facer a súa reserva.

O feito de que nesta iniciativa se implicaran este ano un total de 29 restaurantes achega ás 4.000 prazas o aforo diario que ofertan todos estes establecementos, ofrecendo ao mesmo tempo un amplo abano de posibilidades en canto a modalidades de preparación do cocido e tamén no referente aos prezos -poden oscilar entre os 12 e os 45 euros, dependendo de variables como a categoría do establecemento, os viños servidos ou os postres-.

O obxectivo deste XII Mes do Cocido é que colectivos, grupos de amigos ou familias se acheguen a Lalín a celebrar os seus encontros, compartindo con calma un cocido preparado coas mellores viandas. Dende a Concellería de Comercio agárdase que esta campaña sirva como revulsivo do sector da hostalería e da restauración na tradicional costa de xaneiro, garantindo a presenza de milleiros de persoas en Lalín para comer, mercar nos comercios locais ou simplemente pasear.